منتديات الحوار الجامعية السياسية

للي مش فاهمين نزولنا
للي معاشوش ظلمنا ولا قهرنا وحسوش نزولنا
للي مداقوش مر جوعنا
اللي مناموش في الشوارع كالدبايح
كملوا في الليل عشاهم م الصفايح
للي مش فاهمين مهانة الرجال
قهر الرجال
اللي بيقولوا علينا اننا حبة عيال
احنا مش حبة عيال
احنا شوفنا النيل بينشف في البيوت
واما يجري يتفرش حمام سباحة في قصر باشا
مستكترين فيا الغضب؟
مانا كنت غرقان في البشاشة
كنت راضي ببؤ مية واقول دي هانت
كنت ببكي في القصايد
كنت بشتم في القصايد
تتقطع ايدي اما قولت حبيبتي ماتت
للي مش فاهمين نزولنا للشوارع
احنا بندور على الحلم اللي ضايع
احنا جرينا النفس في عروق عيالنا يكبروا فاهمين حاجات مفهمنهاش
اقبل اني اعيش عشان حلم وقضية بس مقبلش عمري يضيع بلاش
ماحنا سيبنالكوا البلد منصفتوهاش
متلوموش عاللي اتعجن في المعجنة واللي اتظلم
واذا كنتوا فاكرينا غنم على رزقكم انا جدي فاق
فاكرين زمان حذرتكم
مستني ايه من طفل ربوه بالزعاق غير المشاكل والخناق
اذا كنتوا فاكرينا غنم على رزقكم انا جدي فاق
للي مش فاهمين نزولنا في الشوارع
الحكومة نزلتنا في الشوارع
عودتنا على الشوارع
الحكومة بيتتنا في الشوارع
سكرت على نفسها كل البيبان
خوفتنا من البيبان
فاترمينا كلنا في حضن الشوارع
اكتر مكان لقيناه امان
اللي خايفين ع البلد احسن تموت
متخافوش الموت سكوت
واحنا مش في الخطة اصلا ان بكرة يكون سكوت
احنا شايلين حلمنا ومكملين
بكرة بيشاور علينا واحنا مش مستعجلين
ماحنا لينا كام سنة متقندلين
صابحين في طين
نايمين في طين
احنا بنأسس بلد تسمع شكاوى المظلومين
نشتغل نلقى عرقنا قصاد عينينا
مش في جيب النصابين
نشتكي نلقى الودان نلقى اللي يسمع شكوة الناس الغلابة الطيبين
احنا بنشكل بلد لاهي خايفة من صوت الاذان ولا خايفة ان الكنايس تتبني
احنا بنأسس وطني عفيان .. غني
مش وطن يخدم 15 نفر ويبات جعان
احنا مش عايزين وطن مهزوز مهان
المصري مش لايقة عليه كلمة مهان
ويقولك احنا عملنا فوضى
طب احنا بردو عملنا فوضى؟
داحنا كنا بنتجلد ونعيش ونرضى
واحنا كنا بنتسرق ونعيش ونرضى
كانت الاسعار بتغلى وانا كنت برضى
والشرطة بتفتشني عادي في اي وقت في اي حتة بدون مناسبة وكنت برضى
والانتخاب من سن كام لسن كام معرفش ليه
وكنت برضى
جاي النهاردة تقولي احنا عملنا فوضى؟
طب فوضى فوضى
ماسورة الغاز بتقفلها لصعيد بلدك
وتل ابيب بتفتحها؟
ماسورة الغاز بتقفلها على ولادك
وللأعداء بتفتحها؟
وناس شقيانة طول اليوم عشان لقمة
وغالي ياخدها ع الجاهز
الهي يا رب يطفحها
وناس تسكن قصور بتدور
وناس الجوع بيدبحها
وناس بتموت في الميادين فدى الثورة
وناس خايفة على مشاعره لنجرحها
احنا هنكمل وهنزق البيبان
يارب انت المستعان
واللي بيقولوا علينا مغيبين ومسطحين ومعفنين ومنتنين وبوابين ومأجورين
قولوا براحتكوا احنا بردو مؤدبين
ومسالمين
بس احنا بردو مكملين

للاستماع
احسن من قرائتها

http://www.youtube.com/watch?v=zeJAHlDxNgc[/youtube]


منقول عن ,,, هشام الجخ
لهجه عاميه مصريه ,,, نوبيه