أعزائى ..أبدأ كلامى بالسلام
هذا الشعر أعجبنى كثيييييراً
**(كلـمـتـيـن )**
كل عين تـعشق حليـوة
و إنتى حلوة فى كل عين
يا حبيبتى أنا قلبى عاشق
و اسمحيلى بكلمـتـيـن
كلمـتـيـن يا مـصـر يمكن
هما اخر كلمتين
حد ضامن يمشى آمن
أو مآمن يمشى فين
شابة يا ام الشعر ليلى
و الجبين شق النهار
و العيون بحرين أمانى
و الخدود عسل و نار
و اللوالى بابتسامتك
يحكوا أسرار المحار
يللى ساكنة القصر عالى
ايمتى يهنالى المزار
كلمينى يا صـبـيـة
طال عليا الانتظار
كلمتين يا مصـر يمكن
هما اخر كلمتين
حد ضامن يمشى آمن
أو مآمن يمشى فين
قصرك المسحور غيلانو
أغبى من دود الغيطان
بعد مص الغصن لاخضر
ينـحتـوا عضم العيدان
كلمتين يا مصـر يبقوا
هما اخر كلمتين
حد ضامن يمشى آمن
أو مآمن يمشى فين
أدى كلمة من عذابى قلتها لك
باقى كلمة
من حنينى صنتها لك فى الضلوع
من دنيا ظلمة
كنت خايف يلمحوها يقتلوها
فى سكة ظلمة
سقسقت و النور بشاير
زهرة الصبار يا سلمى
يا نسيم الشوق يا طـايـر
خد لمصـر فى الصبح كلمة
طول ما يبقى الركب ساير
بالبصاير و العينين
يبقى ضامن يمشى آمن
يبقى عارف يمشى فين
الشاعر : أحمد فؤاد نجم
Nour نور
